ເສັ້ນທາງຊີວິດ

ເສັ້ນທາງຊີວິດ ຄົດໂຄ້ງໂງເງ
ບາງຄັ້ງຊັດເຊ ພະເນຈອນໂດດດ່ຽວ
ບາງຄັ້ງມີເພື່ອນ ຮ່ວມເດີນບໍ່ດຽວດາຍ
ບາງຄັ້ງສະບາຍ ບາງຄັ້ງລຳເຄັນ.

ບາງຄັ້ງເສັ້ນທາງ ອາບໂຮຍເກສອນ
ກິ່ນກຸຫລາບຂະຈອນ ບົວບານເບັ່ງງາມ
ບາງຄັ້ງອັບເສົາ ເສົ້າສ້ອຍສິ້ນຫວັງ
ບາງຄັ້ງມີພະລັງ ລົ້ມແລ້ວລຸກໃໝ່.

ບາງຄັ້ງເໜັບໜາວປວດລ້າວຮືໄທ
ບາງຄັ້ງຫວັ່ນໄຫວໄປຕາມການເວລາ
ບາງຄັ້ງມືດມົນ ສັບສົນອຸຣາ
ບາງຄັ້ງສະຫງ່າ ແນມເຫັນຫົນທາງ.

ເສັ້ນທາງຊີວິດ ຄົນເຮົາລິຂິດເອງ
ຕ້ອງສູ້ຕ້ອງເສັງ ເຂັ້ມແຂງແຂ່ງຂັນ
ສູ້ກັບຕົນເອງ ຢູ່ທຸກຄືນວັນ
ສູ້ໃຫ້ຊະນະຈິດໃຈທີ່ທໍ້ຖອຍ.

ຕ້ອງມີວັນໜຶ່ງ ວັນທີ່ຄອງຄອຍ
ໝົດຄວາມຕ່ຳຕ້ອຍດ້ອຍຄ່າໃນໃຈ
ວັນທີ່ທຸກຢ່າງກະຈ່າງແຈ້ງພາຍໃນ
ວັນທີ່ມີໄຊ ຕ້ອງເປັນວັນຂອງເຮົາ.

ຄຳອະທິດຖານ ໃນງານບຸນແຫ່ຜາສາດເຜີ້ງ

Wax-castle procession in Wat Ongtue and Wat Inpeng

ມີຊີພຽງວັນດຽວທີ່ດຸໝັ່ນ ດີກວ່າຮ້ອຍປີທີ່ຂີ້ຄ້ານ

ຟ້າວສ້າງຄວາມດີ : Make haste in doing good

ທະເລກິເລສ

ຄວາມຈິງຂອງຄວາມທຸກ

- ທຸກຄືຄວາມບີບບີ້ ໜີບໜ່ວງຊວງອົກ
ໃຜບໍ່ຫວັງພານພົບ ຫແຕ່ພຽງພໍໜ້ອຍ
ແຕ່ ບໍ່ອາດຖອຍໜີພົ້ນ ຄົນເຮົາຕ້ອງພົບຜ່ານ
ບໍ່ວ່າໃຫຍ່ແລະນ້ອຍ ທຸກຖານະຊາດຊັ້ນ ຊິເຫັນແທ້ຄູ່ຄົນ.

- ບາງຄົນ ທຸກຍ້ອນພັດພາກບ້ານ ສັບພະສິ່ງມູນມັງ
ລວມທັງມວນພົງພັນ ເຜົ່າຊຸມແຊງເຊື້ອ
ມີບິດາມານດາໄທ້ ຈຳໃຈຈາກຫ່າງ
ເພື່ອໄປເນົາຢູ່ຄ້າງ ເມືອງບ້ານອື່ນເຂົາ.


- ບາງຄົນ ທຸກຍ້ອນອຶດຢາກເຂົ້າ ເຂີນຂາດແລງງາຍ
ເງິນບໍ່ມີຮອງຖົງ ຊິຫອດຫິວຕາຍຍ້ອນ
ໃຜບໍ່ມາເຫັນຮູ້ ເອັນດູບິແບ່ງ
ຝູງໝູ່ຍາດພີ່ນ້ອງ ເໜືອໃຕ້ກໍບໍ່ມີ.

- ບາງຄົນ ທຸກຍ້ອນຜອມໂຊໄຂ້ ຫວັດໄອມາບັງບຽດ
ເງິນທີ່ໂຮມຮໍ່ໄວ້ ພໍໄດ້ແຕ່ຄ່າຢາ
ແສນຊິຫາມາໄດ້ ກໍໝົດໄປບໍ່ຄ້າງໄຖ່
ການຈັບຈ່າຍມີສູ່ມື້ ຊິຫາໃຊ້ບໍ່ທ່ວງທັນ.

-ບາງຄົນ ເງິນຄຳແກ້ວ ທຸກຢ່າງມີມາ
ມູນມັງມີເຫຼືອຫຼາຍ ຈ່າຍສະບາຍບໍ່ເຄືອງຮ້ອນ
ແຕ່ມີແນວເຄືອງຂ້ອນ ຂັດໃຈຍ້ອນບໍ່ຊື່
ຜົວ-ເມຍລັກຫຼິ້ນຊູ້ ໃຈລ້ຽວບໍ່ຮັກກັນ.

- ບາງຄົນມີຍົດຊັ້ນ ສັກໃຫຍ່ຢຳເກງ
ມູນມັງມີມວນຄົບ ຄູ່ອັນສະໜຸກໃຊ້
ແຕ່ກໍຍັງຢຳຢ້ານ ຄົນພານມາບັງບຽດ
ຄອຍລະວັງທຸກເມື່ອມື້ ຢ້ານເຂົາຂ້າເຂັ່ນຕາຍ.

- ບາງຄົນ ທຸກຍ້ອນຍາດພີ່ນ້ອງ ມໍຣະມິ່ງຕາຍປະ
ປ່ອຍໃຫ້ພອຍດຽວດາຍ ນັ່ງນອນແສນເສົ້າ
ແສນຊິວອນວຽນເອີ້ນ ໃຫ້ຫວນຄືນຄືເກົ່າ ບໍ່ໄດ້ແລ້ວ
ໂລກມັນເປັນຈັ່ງຊີ້ ຊິພານພໍ້ທຸກຄົນ ເຈົ້າເອີຍ.

- ອີກຢ່າງ, ສູ່ມື້ນີ້ໂລກຫວັ່ນວຸ້ນ ຮ້ອນເຮັ່ງຫຼາຍອັນ
ພະຈັນເຄີຍສົດໃສ ຮຸ່ງເຮືອງຮຽງຟ້າ
ກໍມືດມົວເມົາຄື້ມ ໂຄຈອນບໍ່ຄືເກົ່າ
ເມກໝອກບົດໝື່ນຊັ້ນ ບໍ່ໃສແຈ້ງສ່ອງເງົາ.

-ອາທິດສູນເຊື່ອມເສົ້າ ເມົາມືດມົວແສງ
ບາງເທື່ອທໍແສງເຮືອງ ອາບແຮງຮົນຮ້ອນ
ບາງເທື່ອເຜົາຜານມ້າງ ກາຍເປັນໄຟຈູດຈີ່
ລາມປ່າໄມ້ ຮົມໄໝ້ມຸ່ນທະລາຍ ກໍມີ.

- ຍ້ອນສີມືມະນຸດສ້າງ ຈູດຈີ່ລົນເຜົາ
ມ້າງມຸ່ນພົງພະນາດອນ ປ່າຂຽນໃຫ້ສູນສິ້ນ
ດິນຈິ່ງພັງທະລາຍມ້ວນ ທໍລະນີຂຳເຂືອກ
ວາໂຍຂັບເຄື່ອນຍ້າຍ ທຳລາຍມ້າງມະນຸດເຮົາ.

-ທຸບພິກຂະໄພເກີດຂື້ນ ລົງໂທດມວນມະນຸດ
ເຮືອນຊານເຊເພພັງ ໄຮ່ນາບໍ່ເຫຼືອຄ້າງ
ເຂົ້າຂາດນາບໍ່ເຫຼືອເລົ້າ ພໍໄຍໄວ້ລ້ຽງມ່າມ
ຫຼາຍໝູ່ຄາມເຂດບ້ານ ຈິ່ງຂໍຮ້ອງໃຫ້ຊ່ວຍເຫຼືອ.

- ບາງຄົນ ທຸກຍ້ອນເສດຖະກິດບໍ່ເອື້ອ ບໍ່ຄົງທີ່ຖາວອນ
ໄພວ່າງງານຈອນມາ ຄ່າເງິນຟູມເຟີ້
ຈິ່ງຕົກງານລະເມີໃຫ້ ຮັກສາໃຈຍາກລຳບາກ
ໂລກຫາກພວມພົບພໍ້ ເປັນແທ້ທົ່ວແດນ ເຈົ້າເອີຍ.

-ທຸກອີກຢ່າງ ຍ້ອນໂລກກວ້າງ ຍາດແຍ່ງແຊງດິນ
ຍ້ອນວ່າໂລພາບັງ ບອດຕາບໍ່ເຫັນແຈ້ງ
ເກີດການສັງຫານຂ້າ ສົງຄາມເຜົາຈີ່
ເໝືອນທຸກໃນອະເວຈີ ທີ່ຄົນເຮົາສ້າງຂື້ນ ໃນໂລກມະນຸດຄົນ.

- ມັນຫາກສັບສົນແທ້ ຮ້ອຍແປດພັນບັນຫາ
ເກີດຈາກມືມວນມະນຸດ ບໍ່ອາດພັນລະນາໄດ້
ຈິ່ງຂໍສັງຮອມໄວ້ ໃຈຄວາມຢູ່ ສອງຢ່າງ
ຄື ທຸກກາຍ-ທຸກໃຈ ໃຜບໍ່ຫຼົບຫຼີກໄດ້ ຮຽງຂ້າງຢູ່ຄູ່ຍາມ.

-ທຸກກາຍ ຍ້ອນພະຍາດຮ້າຍ ເຈັບປວດວິນຫົວ
ທຸກໃຈ ຍ້ອນໂລພະ, ໂທສະ, ໂມຫະຄອງ ຄູ່ໃຈບໍ່ເຫັນແຈ້ງ
ໃຜຫາກວາງໃຈໄວ້ ເຫັນຄວາມຈິງທຸກຢ່າງ
ເຫດ-ຜົນ ຄິດໄຄ່ຄົ້ນ, ມີທັມມະປ່ຽມລົ້ນ.... ວາງໄວ້ບໍ່ທຸກໃຈ ຊອບແລ້ວ.

A wordling and an enlightened person

The difference between a worldling and an enlightened person is that the former misconceives "I" as something real while the latter knows that it is unreal and is used only for conventional purposes.

Buddhadāsa Bhikkhu

ຄວາມແຕກຕ່າງລະຫວ່າງປຸຖຸຊົນກັບຜູ້ສິ້ນກິເລສ

ຄວາມແຕກຕ່າງລະຫວ່າງປຸຖຸຊົນກັບພຣະອະຣະຫັນນັ້ນກໍຄື ສິ່ງໃດທີ່ເຄີຍເຫັນຜິດໃນຄວາມມີຕົວຕົນ"ຕົວກູ" ວ່າເປັນຂອງຈິງ
ແຕ່ເມື່ອພາຍຫຼັງຮູ້ວ່າມັນບໍ່ຈິງ ແລະໃຊ້ເພື່ອຈຸດປະສົງສິ່ງສົມມຸດເທົ່ານັ້ນ.

ພຸດທະທາດ ພິກຂຸ

The termination of the Vassa(Pavāraṇā )

When the end of Vassa has arrived,
It is the day when being free from defilement,
For those who earnestly have trained their mind,
And it is the day to review 3 months behind,
To see how they have passed by,
And to recall how much progress we have done.

Pavāraṇā means that everyone opens for feedback from friends,
To say some words for better understanding,
To confess and negotiate for better coexistence,
It is an ancient tradition from the Buddha's time.

ອອກພັນສາປະວໍຣະນາ

ພໍເມື່ອເຖິງຂວບເຂົ້າ......................ເດືອນໃໝ່ເຫມັນ
ລະດູໜາວມາເຖິງ.......................ປ່ຽນລະດູເດືອນຍ້າຍ
ເຂົ້າໃນນາພວມເຂັ້ມ......................ສຸກເຫຼືອງເຕັມທົ່ງ
ຊາວໄຮ່ນາທົ່ວດ້າວ......................ສະອອນເຂົ້າໃສ່ເຍຍ.


ຜົນເກັບກ່ຽວກໍພຽບພ້ອມ..................ເຂົ້າກໍໃໝ່ພວມຫອມ
ຊາວນາປອງດອງຫາ....................ພັດຕາຫານໃຫ້ສົງເຈົ້າ
ມີເຮັດບຸນຄູນເຂົ້າ.......................ບູຊາຄຸນຜົນລະປູກ
ແມ່ໂຄສົບຜູ້ໃຫ້ເຂົ້າ......................ລ້ຽງຊາວນາທົ່ວດ້າວ ຄາວນີ້ໄດ້ແຕ່ງບຸນ.

ສ່ວນພຣະສັງຄະເຈົ້າ.....................ຜູ້ຢູ່ວັດຮັກສາຄອງ
ສະແດງທັມສິດສອນ.....................ໝູ່ຂະໂຍມແລງເຊົ້າ
ຕອນນີ້ເຖິງຄາວແລ້ວ.....................ອອກພັນສາມາຮອດ
ຈິ່ງຊິລາຈາກບ້ານ......................ອາຮາມກ້ວາງຈາຣີກທັມ ສາແລ້ວ.

ແນວໃດດີຜ່ານຫ້ອງ.....................ຮຽນຮ່ຳໃນຊຸມສົງ
ເຈດຈຳນົງເນໝາຍ......................ເພື່ອສັງສອນຊາວບ້ານ
ກັບສອນຕົນໃຫ້ດີພ້ອມ...................ຈິ່ງສອນໂຍມໃຫ້ສືບຕໍ່
ເພື່ອສົ່ງເສີມທັມພຣະພຸດທະເຈົ້າ.............ໃຫ້ແຜ່ຜາຍອອກກ້ວາງ ໃຫ້ຄົນຮູ້ລື່ນຫຼັງ ຊອບແລ້ວ.

ຄົບບັນດິດ

ຄົບບັນດິດ

ສະກິເທວະ ສຸຕະໂສມະ ສັບພິ ໂຫຕິ ສະມາຄະໂມ
ສາມັງ ສັງຄະຕິ ປາເລຕິ ນາສັບພິ ພະຫຸ ສັງຄະໂມ

ຄົບບັນດິດ ໂດຍລຳພັງ ພຽງຄັ້ງໜຶ່ງ
ກໍ່ໄດ້ເພິ່ງ ຕລອດໄປ ພົ້ນໄພຜອງ
ຄົບຄົນພານ ມົ້ວສຸມ ເປັນກຸ່ມກອງ
ບໍ່ປົກປ້ອງ ປ່ອຍທຸກ ເຂົ້າຮຸກຮານ.

ຈາກນິທານຊາດົກເລື່ອງ: ອະສິຕິນິບາດຊາດົກ
06/06/2007 9:23 AM

ອຸປະມາຊີວິດ ໗ ປະການ

ອຸປະມາຊີວິດ ໗ ປະການ

ໜຶ່ງ: ຊີວິດປຽບເໝືອນຢາດນ້ຳຄ້າງ ກວັດແກວ່ງເທິງໃບບອນ
ບໍ່ຫ່ອນເທຍລະຄາຄົງ ຍິ່ງຍືນຍາວໝັ້ນ
ຍາມເມື່ອລົມພານຕ້ອງ ໃບບອນເອນອວ່ຍ
ຢາດນ້ຳຄ້າງເຄື່ອນຟົ້ງ ເຟືອນຟາດສູ່ດິນ.

ສອງ: ຊີວິດເໝືອນດັ່ງນ້ຳ ໃນອຸແອ່ງບໍ່ພໍຢາ
ດື່ມບໍ່ພໍພຽງກືນ ກໍ່ເລົ່າມາຍເຫີຍແຫ້ງ
ຫາມາເປັນຢາແກ້ ກະຫາຍຫິວບໍ່ມີຊວ່າງ
ເຕັມແລ້ວບົກເຫືອດແຫ້ງ ແປປີ້ນປ່ຽນໄປ.

ສາມ: ຊີວິດເໝືອນຮອຍຂີດໄມ້ ປະທັບໃສ່ເທິງວາລີ
ສາຍນະທີທານໄຫລ ໜ້ອຍດຽວກໍ່ສູນກ້ຽງ
ພຽງພັບຕາກໍ່ສູນສ້ຽງ ບໍ່ມີຮອຍພໍໄວ້ເບິ່ງ
ຊີວິດຄົນບໍ່ຢູ່ເຫິງ ເໝືອນດັ່ງໄມ້ຂີດນ້ຳ ຈຳໝັ້ນຢ່າໄລ.

ສີ່: ຊີວິດເໝືອນແມ່ນ້ຳ ນະທີທ່າທານໃສ
ໄຫລລ່ອງລົງພູຜາ ປ່າພະນາແນວໄມ້
ໄຫລບໍ່ມີຢຸດຢັ້ງ ໂງຄືນໂຄ້ງຕ່າວ
ຊີວິດເຮົາກໍ່ດັ່ງນ້ຳ ໄຫລແລ້ວບໍ່ອວ່ຍຄືນ.

ຫ້າ: ຊີວິດເໝືອນກ້ອນດິນນ້ອຍ ໃນທົ່ງຫົວນາ
ກ້ອນຂີ້ໄຖແຖວນາທາມ ທ່າມກາງຝົນຟ້າ
ຍາມຝົນຮອຍຮຳຍ້ອຍ ກ້ອນໄຖມ້ອຍລະແມ່ງ
ບໍ່ຫ່ອນຕັ້ງຢູ່ຜົ້ງ ນາກວ້າງແກ່ນດິນ.

ຫົກ: ຊີວິດເໝືອນດັ່ງຊີ້ນ ທີ່ຄົນຈີ່ຈືນເຜົາ
ໄຟເຂົາລົນທັງດິບແດງ ປ່ຽນແປງເປັນແຫ້ງ
ໄຟມະໄລກັນກຸ້ມ ອຸກອໍບໍ່ສະຫວ່າງ
ໄຟສາມຢ່າງອຳພາງ ບໍ່ເຫັນທາງພົ້ນອອກໄດ້
ໃຈເອົ້າອັ່ງໝອງ.

ເຈັດ: ຊີວິດແສນເດືອດຮ້ອນ ຂັ້ນລຳບາກສຸດຈະທົນ
ເໝືອນດັ່ງງົວເຂົາຈູງ ແກ່ດຶງໄປຂ້າ
ສຸດທີ່ເວທະນາລົ້ນ ທໍລະມານສຸດໂອ້ອ່າວ
ຊີວິດປຽບດັ່ງນີ້ ເຈັດຂໍ້ກ່າວຖະແຫລງ.

07/07/2007 10:40 PM

Sweet words

Sweet words

As a nightingale sings beautifully,
The wise says pleasant words,
Conveys a comfort feeling to one that hears,
And shows no superior in his speech.

He reasonably crystal clear expounds,
Whose words filled with kind guidance;
Therefore, being delightful when hearing,
As pleasantly as listening to the nightingale!

~~~~~~~~~~~~~~~~~~~~~~~16/09/2006 11:58 AM